recent
أخبار ساخنة

دير سانت كاترين والعجله المنحوته / وطنى نيوز



كتبت مديحه الرشيدى
آخر طريق دير سانت كاترين، فيه نحت في الجبل على شكل عجل، يُقال أن النحت له صلة مباشرة بعجل السامري المذكور في القرآن الكريم، خاصة أنه في نفس المنطقة اللي نزل فيها سيدنا موسى وقابل السامري وشاف العجل اللي صنعه من الذهب، حسب آيات القرآن..
فيه أكتر من رواية للنحت ده ولا واحدة منهم ثُبت صحتها بدليل قاطع، حتى الآن، من ضمنهم أن السامري استغل شكل العجل المنحوت في الجبل بالفعل، كـ نموذج علشان يصنع شبهه 'العجل الذهبي'. وقصة تانية بتقول إن النحت حصل بفعل دفع مياه السيل للتمثال، وخبط بقوة في الصخور لحد ما بقى بالشكل ده. وقصة تالتة بتقول إن سيدنا موسى وصل وغضب من عبادة بني إسرائيل للعجل الذهبي، قام دفعه بقوة لدرجة أنه اتثبت ع الجبل وفضل عبر السنين بالشكل ده.
الآية في القرآن بتقول 'قَالَ فَمَا خَطْبُكَ يَا سَامِرِيُّ (95) قَالَ بَصُرْتُ بِمَا لَمْ يَبْصُرُوا بِهِ فَقَبَضْتُ قَبْضَةً مِّنْ أَثَرِ الرَّسُولِ فَنَبَذْتُهَا وَكَذَٰلِكَ سَوَّلَتْ لِي نَفْسِي (96) قَالَ فَاذْهَبْ فَإِنَّ لَكَ فِي الْحَيَاةِ أَن تَقُولَ لَا مِسَاسَ ۖ وَإِنَّ لَكَ مَوْعِدًا لَّن تُخْلَفَهُ ۖ وَانظُرْ إِلَىٰ إِلَٰهِكَ الَّذِي ظَلْتَ عَلَيْهِ عَاكِفًا ۖ لَّنُحَرِّقَنَّهُ ثُمَّ لَنَنسِفَنَّهُ فِي الْيَمِّ نَسْفًا'.
و'لننسفنه في اليم نسفا'.. ممكن تشير لـ رواية حدوث سيل لدرجة أنه دفع التمثال بقوة وخبطه بالصخور.
شكل العجل مش مذكور كـ مزار سياحي، ولولا أن صادفنا حد يعرفه ماكناش خدنا بالنا منه، والجبال هناك فيها تكوينات كتير جدا فعلا بتصادف أشكال مختلفة كتيرة وكلها بفعل الطبيعة، ولكن نحت العجل صدمني، ومجرد تخيلي للقصة قدام النحت كان حاجة تشيّب، هذا والله أعلى وأعلم.


 

google-playkhamsatmostaqltradent
close