recent
أخبار ساخنة

قصيدة متبتش ليه؟


بقلم : هاني العباسي


حرام عليك


متبتش ليه عن الاوهام 

يا قلبي كفايه متحنش

لأي حبيب ولو كان الدوا هو

بناقص تلتميت مرة 

واطوى في صفحة المكتوب

وتوبة بس علمها بجد تتوب

عن الأحلام 

مادام الحب سلعة حرام

متبتش ليه عن الاوجاع

وسايب كل شرايينك بتنزف ليه؟

وفارش ع الرصيف قلبك 

يفعصوا فيه

يفاصلوا كأنه في الشادر

ونبضك يملكه القادر

والمك بالجرام يتباع

اقولك توب تجادل تاني 

وتقول الوجع مكتوب

بتحلم ليه؟ 

ولسه ضفاير الغفله متبته فيك

وضي بعيد بيحلالك مغمي عنيك

متبت في الخلا بالباط

ورجلك في مهب الريح

وصوت امشير بيتعافى 

على سرك ويكسر في امان بوحك

بتنزف ليه وتتعافى على جروحك؟

بساط العمر مهما يساع

ويفرد حضنه لك بالباع

هييجي ف يوم وتفلت دفته منك

وينسى في زحمته لياليك

وشيب نواصيك 

وضهرك لما يتحسر ويحني الروح

ونسر عجوز بيكسر سنته وسنك

متبتش ليه؟

مفيش تاني قلوب ولا حب

يستاهل هتبكي عليه

اقولك سر..... برغم المر والعلقم

وطعم الحنضل المربوب ف حلق الليل

يموت الحر 

ولا يتذل . وتحفظ ذكرته المواويل

سمعت الصوت؟ 

هناااااك تعلب ورا تعلب بيغلب سيده ويفوت

اقولك ....

تف ع الاوهام واشبع موت


د. هاني العباسي

google-playkhamsatmostaqltradent
close