recent
أخبار ساخنة

مات الكلام بقلم : طلعت حلمى عامر/وطني نيوز

 

مات الكلام
لما يبقى الشعر حرف
مالوش مقام
لما تبقى الكلمه طالعه م الشفايف
لما يبقى الكل شايف
إنها بحروف حرام 
وتلاقيهم فى انسجام 
يبقى ع الدنيا السلام
مات الكلام 
لما يبقى الصوت سكوت 
واللى ينطق يوم يموت!
 لما تلقى اللص قادر 
إنه يدخل جوه خيط العنكبوت
 لما يبقى الحرف مش قادر يفوت
وسط سرب من الحمام 
   لما يبقى الخوف إمام
قول على الدنيا السلام
مات الكلام 
 لما صوت الحق غاب 
لما عشنا وسط غاب 
  والضمير جوانا شاب
صوتنا اصبح صوت غراب
فى النفوس عَشش خراب
 والجميع اصبح لئام
والشيطان من غير لجام
 وقتها مات الكلام 
 لما يبقى الشعر عاله
والحروف تبقى اشتغاله
كان زمان الشعر حاله
 واللى بيكتب اسمه شاعر
 فى الزمن ده الحرف تاه
حرف خالى من المشاعر 
 حرف ماشى بصوت هواه
 حرف بيطبل ل ده
او بيلعن ده و ده 
حرف مش صادق بروحه
 حرف خايف من جروحه
حرف ناقص فى العلام 
حرف طبله او سهام 
يبقى ايه اخر الكلام
مات الكلام

google-playkhamsatmostaqltradent
close