recent
أخبار ساخنة

ممكن الحب يرجع من جديد ...ممكن الحب يرجع من جديد / وطنى نيوز


 


دكتورة فاطمه محمود
 
كثير من السيدات بتسألنى تفتكرى ممكن الحب يرجع من جديد فى العلاقة الزوجية بعد ما يكون أختفى.....
..هو أحنا نقدر نحييى حبنا من أول وجديد؟
....أة ممكن بس بشروط؟؟ أيه هى الشروط أو الطرق دى؟
أهم شىء أن يكون الطرفين عندهم نفس الرغبة فى تصحيح العلاقة واحياء الحب مرة ثانية...مش واحد عاوز والثانى مش فارق معاة!!!
1- الواقعية و المنطقية فى العلاقة الزوجية...يعنى لازم أقيم نفسى فى العلاقة قبل ما أقيم الطرف الثانى ولازم أبدأ أصلح من نفسى ومن أخطائى قبل ما أطلب من الطرف الثانى أنة يصلح من أخطائه
(مثال: اسأل شريكى أنت سعيد معايا؟؟ طيب أيه اللى بيزعلك علشان أبطله /أيه اللى بيفرحك علشان أعمله)
2-لازم نفهم أن فى مشاعر ثانية فى الجواز مهمة غير الحب (مثال: الأحترام/التقدير/الأحتواء/الأهتمام ) فى حالة إنك فقدت المشاعر دى هتعرف وهتفهم أنها أهم من الحب جوة العلاقة لأنها مشاعر بتكمل أحساس الحب
3-علشان الحب يدوم ويكمل ويكبر لازم يبقى فى حوار خاص بيكم أنتم الاثنين بتتكلموا عن ( مشاعركم / رغباتكم / أحلامكم ) علشان الحب يفضل موجود والأحساس يفضل دافى
للأسف بعد الجواز بيحصل حالة من فقدان الحوار بين الزوجين بيبقى كلامهم كله عبارة عن ( المشاكل / الأولاد / الفلوس /الأهل / الشغل) وبننسى خالص أننا موجودين لسة فى حياة بعض.
4-المرونة....لازم نعدى لازم نكبر دماغنا على حجات صغيرة بلاش نقف على التافهة ونعملها مشكلة كبيرة وخناقة
لازم نعرف أن طبيعى أننا مختلفين والعادى أننا مش شبهة بعض فبلاش نحاول دايما" أننا نخلى الطرف الثانى نسخة مننا علشان دة عمره ما هيحصل
5- لازم يبقى فى وقت ليكم أنتم الاثنين لوحدكم وقت خاص بيكم بعيد عن االأولاد والمشاكل ....بعد فترة من الجواز بنلاقى كل حاجة أختلفت الخروج بقى علشان الأولاد والسفر علشان الأولاد حتى الأكل بقى أية اللى بيحبه الولاد,,,وبننسى نفسنا خالص وبننسى أننا لينا حقوق على بعض وأن لينا حياة لازم نحافظ عليها
المفروض كل فترة لو الظروف المادية تسمح نسافر كام يوم لوحدنا نجدد بيهم مشاعرنا وحبنا وروحنا ..(نلعب /نجرى/نهزر/نغنى ) نستمتع بحياتنا علشان يبقى عندنا طاقة نكمل المشوار
لو الظروف ماتسمحش نخرج خروجة حلوة أو حتى نفضل فى البيت بس لوحدنا نعمل فى اليوم دة كل اللى محرومين منه....الوقت ده هو اللى بيبقى الرصيد الحلو اللى بتحوشه علشان تسحب منه وقت الأزمات والمشاكل..لكن تخيل كدة لو مفيش الرصيد دة هتلاقى نفسك بتقول عفوا" لقد نفذ رصيدكم!!!!!! مبقاش عندى قدرة على التحمل ثانى
6-رسالة مكتوب فيها وحشتنى / جاى أمتى / أنتى فين / عاوز أسمع صوتك
يااااااااااااة بتفرق اوى وبتغير المود
7-هدية صغيرة كل فترة حتى لو شكولاتة / وردة / أكلة بيحبها.....الهدية دى بتقول أنا مهتم
8-الكلام عن الذكريات الجميلة ( الحب / الخطوبة/الفرح / شهر العسل) الذكريات دى بتجدد مشاعر الحب ويا سلام بقى لو نطلع الصور ونتفرج عليها
9-الحضن...حضن قوى الصبح وبليل لشريك حياتك بيعمل انجاز بيخلى المخ يفرز( هرمون الدوبامين ) المسؤول عن السعادة
10-فى وقت معين لازم نعترف اننا محتاجين لأخصائى علشان يساعدنا نحل مشاكلنا لو وصلنا لمرحلة فقدنا السيطرة والقدرة على حلها...يعنى بلاش العند والانكار
........الحب أجمل أحساس فى الدنيا علشان كدة لما بنفتقده بيحصل خلل با رواحنا بيحصل كسر فى قلوبنا بنبقى مسخ من غير مشاعر ولا أحاسيس
....لما تلاقى الحب امسك فيه بأيدك وسنانك وخليك فاهم أنه الهوا اللى بتتنفسه ومن غيره هاتتخنق.
 
google-playkhamsatmostaqltradent
close