recent
أخبار ساخنة

لقاء صحفى مع الاعلاميه نهال يحيى لتوضيح دور المدونين المصريين فى تنشيط حركة السياحة فى مصر / وطنى نيوز


 


كتب - هانى زكريا 🇪🇬
يقوم الان بعض الشباب المحبين لمصر بعمل جوالات سياحيه داخليه لتعريف المواطن المصرى والاجنبى بمعالم مصر السياحيه الجميله ويأتى ذلك فى اطار تنشيط حركة السياحه فى مصر ومن ضمن هؤالاء الشباب التقت جريدة وطنى نيوز المصريه ب الاعلامية نهال يحيى المتميزه فى مجال السياحةوتحدثت عن عشقها لهذا المجال وافكارها المتعدده لتنشيط حركة السياحة في مصر
س : الفكره جتلك منين يانهال وازى قدرتى يكون ليكى متابعين كتير على وسائل التواصل الاجتماعى فى مصر؟
ج : أنا بحب السفر من زمان واتربيت في بيت بيحب السفر أصلا والدي من واحنا صغيرين كان بياخدني انا واخواتي لفينا كتير في محافظات مصر روحنا العريش ورفح روحنا مطروح واسكندريه وراس البر والاسماعليه وبورسعيد.
كانت دي المصايف المنتشره وقت طفولتي بس
كبرت بحب السفر جدااا وبقيت بسافر لوحدي وبقيت بحب أدون سفرياتي دي واوثقها علي صفحتي الخاصه علي الفيس بوك وبعض الجروبات المهتمه بالسياحه ومتابعين عندي اقترحوا عليا فكره إنشاء صفحه لتتدوين سفرياتي ونقل خبرتي في السفر عليها وبالفعل عملت كده
وواحده واحده بدأ يدخل متابعين عندي وياخدوا شير ويعجبهم المحتوي والصفحه تنتشر وهكذا .
س : احساسك كان ايه في الحدث الكبير برعاية الرئيس عبد الفتاح السيسى اثناء نقل المومياوات الملكية من المتحف المصري، وافتتاح المتحف القومي للحضارة المصرية؟
ج : أكيد مما لاشك إن الحدث كان عظيم وفخر للمصريين ..
لكن أكتر حاجه عجبتتي ف الحدث ونزلتها على صفحتي ان توقيت الحدث جعل معظم الشعب المصرى يهتم بتاريخ وحضارة مصر وبدأو ينزلوا علي صفحاتهم بوستات عن تاريخهم المصري القديم ..
كنت مبسوطه جدا وانا شايفه كل الناس قاعدين يشروا حاجات ومعلومات تاريخيه ..
اتمني انها تتدوم ويفضلوا يهتموا بالتاريخ المصري
س : تفتكرى بعد انتهاء فيروس كورونا من العالم بأذن الله هيكون ايه اكتر مدن فى مصر عليه اقبال من الاجانب لزيارتها؟؟
ج: أعتقد الأقصر وأسوان خصوصا بعد مبادره وزارة السياحه اللي عملتها واهتمامها الكبير بيهم في الشتاء ده هيخلي فيه تركيز كبير عليهم.
س : بتطلبي ايه من وزارة السياحه المصرية لدعم الاعلاميين و المدونين الشباب لتنشيط حركة السياحه فى مصر ؟؟
ج : أكيد بطلب دعمهم بشكل أكبر ب الاعلاميين و المدونيين الشباب المهتمين بالنشر في المجال السياحي ..
خصوصا تسهيل الامور عليهم لدخول الاماكن الاثريه والتصوير فيها لان الموضوع بقا صعب جدا علينا .. وعشان اصور فيديو ترويج لبلدي في مكان سياحي بيطلبوا مني تصريح ب ٥٠٠٠ ج وده كتير لو هصور كام فيديو انا بعمل عمل تتطوعي ومش باخد فلوس منه لكن كل اللي عايزاه ان يتيسرلى انا وغيري من المهتمين بالترويج السياحي اننا نقدر نصور من غير اي صعوبات مادية او فنية.
س : مين من ملكات مصر في العصر الفرعونى عجبك شخصيتها؟؟
ج: بنبهر بقوه وإراده حتشبسوت وبنبهبر بمساعده ودعم نفرتيتي لجوزها إخناتون وإيمانها بأفكاره..
وبنبهر بجمال ورقه نفرتاتري وعشقها لرمسيس التاني
وطبعا الزوجه العظيمه والأم الأعظم والجده الرائعه الملكه تي
زوجه أمنحتب التالت ووالده إخناتون وجده توت عنخ آمون
كانت ولا زالت المرأه المصريه أفضل النساء علي وجهه الارض.
س : ايه اكتر اماكن سياحيه فى مصر بتنصحى المواطن المصرى والاجنبى لزيارتها؟
ج : هتصدقني لو قولتلك كل مصر !
حرفيا ومش ببالغ لو قولتلك كل حته في مصر جميله وليها طابعها الخاص بيها ..
كل شبر في مصر جميل بأهله وناسه وروحه وتاريخه
منصحش ابدا إن حد يروح مكان معين
أنصح جدا ان اي حد قبل ما يفكر يسافر بره يخلص مصر كلها الاول وبعدين يسافر بره ويقارن وف الاخر هيحن لجمال وعشق مصر والشعب المصرى
س : نهال يحيى بتحلم بأيه يحصل عشان تكون السياحه المصريه فى المقدمه دائما؟
ج : أول وأهم حاجه لنجاح السياحه ف اي بلد فى العالم هي سلوك شعبها
بحلم إن المصريين يفهموا جيدا ان السياحه مصدر دخل مهم لمصر ويحافظوا على المؤسسات السياحيه وينموا سلوكهم خصوصا في التعامل مع الاجانب ..
وبحلم اكيد بمشروعات سياحيه اكثر جذبا للسياح واستمرار وزاره السياحه في إنشاء مبادرات للسياحه فى مصر ودعم اكتر للشباب لانهم الاكثر تأثيرا فى عمل دعاية رائعه عن عظمة وجمال الاماكن السياحية فى مصر ام الدنيا.
google-playkhamsatmostaqltradent
close