recent
أخبار ساخنة

خواطر رمضانية .... بقلم : بسمة أحمد عبد الرؤوف / وطنى نيوز


 

 
 
بقلم : بسمة أحمد عبد الرؤوف
♡ شهر رمضان بيجيلنا هدية جميلة من ربنا عشان نشحن فيه طاقة روحانية كبيرة تكفينا لغاية رمضان السنة الجاية .. ونعيش ب { لعلكم تتقون }
زي كده الموبايل لما بطاريته بتفضي بنشحنه بالظبط ..
فإحنا قبل رمضان بنكون خلاص جيبنا آخرنا وييجي علينا رمضان ببركته وطاقاته العالية عشان يملانا بالطاقات الإلهية النورانية ويجدد روحنا .. ويصلح فينا النفس ويهذبها للأفضل .
◇ شهر رمضان ربنا بيسهل علينا فيه العبادات .. بيسهل علينا القرب ليه .. الجو حوالينا بيكون مُهَيَّأ لينا .. كل حاجة في رمضان بتعرفنا علي ربنا وبتقربنا ليه ..
☆ بنبقي في رمضان كأننا كده ضيوف عند ربنا والمُضيف سبحانه وتعالى مجهزلنا كل حاجة ويكرمنا كمان بأضعاف أضعاف علي أي عمل يرضيه وعلي أبسط حسنة كمان .
● عشان كده نخلي شعارنا في رمضان [ لن يسبقني إلي الله أحد ]
ونجاهد نفسنا علي الطاعة والقرب لربنا ..
ونحرص إننا نبذل فيه أقصي جهد نقدر عليه عشان نحصد أكبر قدر من الحسنات ورضا رب العالمين ..
عشان نخرج من رمضان ( عباد ربانيين مُتَّقين لله ) ونكمل حياتنا وإحنا بنحب ربنا وشايفينه في كل حاجة حوالينا ومتخلقين بأخلاق وصفات ربنا في كل حياتنا .. مش بس في رمضان ..
وبنلتزم بأوامره وبنتجنب نواهيه سبحانه وتعالى .
■ ومهم كمان إننا مانأخرش صلاة في رمضان عن معادها .. أول ماالآذان يأذن نجري علطول نصلي لرب العالمين لأنه هو اللي بينادينا وبيقولنا نجاحكم وفلاحكم في صلتكم بيا مش المؤذن اللي بينادي ..
فاحرصوا إنكم تحافظوا علي الصلاة في أول الوقت يعني من بعد الآذان لغاية نص ساعة ..
لأن النبي عليه الصلاة والسلام سُئِل : [ يا رسولَ اللهِ، أيُّ الأعمالِ أَفضَلُ؟ قال: الصَّلاةُ لوَقْتِها.]
وفي رواية [ الصلاةُ في أولِ وقتِها ]
¤ وهقولكم شعارات رمضانية كمان تشجعنا أكتر وتقوينا أكتر وتعلي همتنا أكتر وأكتر :
قال تعالي : {وَعَجِلْتُ إِلَيْكَ رَبِّ لِتَرْضَىٰ }
قال تعالي : { وَسَارِعُوا إِلَىٰ مَغْفِرَةٍ مِّن رَّبِّكُمْ وَجَنَّةٍ عَرْضُهَا السَّمَاوَاتُ وَالْأَرْضُ أُعِدَّتْ لِلْمُتَّقِينَ }
وقال تعالي : { سَابِقُوا إِلَىٰ مَغْفِرَةٍ مِّن رَّبِّكُمْ وَجَنَّةٍ عَرْضُهَا كَعَرْضِ السَّمَاءِ وَالْأَرْضِ أُعِدَّتْ لِلَّذِينَ آمَنُوا بِاللَّهِ وَرُسُلِهِ ۚ ذَٰلِكَ فَضْلُ اللَّهِ يُؤْتِيهِ مَن يَشَاءُ ۚ وَاللَّهُ ذُو الْفَضْلِ الْعَظِيمِ }
وقال تعالي :
{ شَهْرُ رَمَضَانَ الَّذِي أُنزِلَ فِيهِ الْقُرْآنُ هُدًى لِّلنَّاسِ وَبَيِّنَاتٍ مِّنَ الْهُدَىٰ وَالْفُرْقَانِ ۚ فَمَن شَهِدَ مِنكُمُ الشَّهْرَ فَلْيَصُمْهُ ۖ وَمَن كَانَ مَرِيضًا أَوْ عَلَىٰ سَفَرٍ فَعِدَّةٌ مِّنْ أَيَّامٍ أُخَرَ ۗ يُرِيدُ اللَّهُ بِكُمُ الْيُسْرَ وَلَا يُرِيدُ بِكُمُ الْعُسْرَ وَلِتُكْمِلُوا الْعِدَّةَ وَلِتُكَبِّرُوا اللَّهَ عَلَىٰ مَا هَدَاكُمْ وَلَعَلَّكُمْ تَشْكُرُونَ •
وإذَا سَأَلَكَ عِبَادِي عَنِّي فَإِنِّي قَرِيبٌ ۖ أُجِيبُ دَعْوَةَ الدَّاعِ إِذَا دَعَانِ ۖ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ }
وصدق الله العظيم
 


google-playkhamsatmostaqltradent
close