recent
أخبار ساخنة

متنازل عـ الصُحبية ......... بقلم : طلعت حلمى عامر / وطنى نيوز


 
بقلم : طلعت حلمى عامر 
 
افكارك كلها عاطفية
بتوقع م الستات100
وحروفك سهله وحرامية
وبتمشى على وش المايه
***
اجمع واطرح بالملاغيه
وابنى لنفسك فى الهوا غيه
واعمل من قلبك تسليه
واتسلى مع بنت شقيه
***
خرط م الاشعار ملوخيه
سبِّك شعرك بالـتقليه
قدم شعرك على طبليه
وعيش مع حرفك فى الليله ديا
***
سيبك من أشعار مهريه
وسيبك من شعرا مغريه
اصل كلامهم مالهوش ديه
عايشين بس على المرازيه
***
مجنون وانا كان ايه درانى
إن جنانه يا ناس خلانى
اكتب شعر واقول اه يانى
كان مين بس عليه دا رمانى
***
قالوا عليه طيب وأنانى
وانا ايه بس يا ناس كان جانى
هو خلاص لغبط لى كيانى
لو مجنون هأطلع فى جنانى
وجن بجن وتبقى قضيه
***
طب احكموا انتوا يا اصحابى
انا غلطان ولا اقفل بابى
ولا اقفل علشانه حسابى
ولا اسرح خلفه بجلابيه
***
شاعر لكن زاد فى جنانه
وأنا مش واقف على إحسانه
بأعرف فى الشعر واوزانه
وأمشى على السطر بحرفيه
***
طار النوم من عينى خلاص
وانا كنت بحبه بإخلاص
واتارية بيحدفنى ببلاص
وأصحابه قالوا عنه رزيه
***
انا متعكنن قوى يا جماعه
والموضوع محتاج شماعة
علشان اعلق زهقى الساعه
انا زعلان محتاج ترضيه
مين فيكم يبعت لى هديه
***
حد يروح له يقول له عوافى
مش هأقدر امشى وراك حافى
شعرى خلاص بقى هو لحافى
عمرى ماكنت فى يوم اسكافى
مش مستنى حروف مهريه
ولا ينفع تبعت لى أذية
***
وانا غلطان حسيت بغيابك
واهتميت أسأل احبابك
وأعرف اية كانت اسبابك
وأتاريك عايش على المرازيه
وانا متنازل عـ الصُحبيه
***
 

 

google-playkhamsatmostaqltradent
close