recent
أخبار ساخنة

تعرف علي الشاعر ديفيد منيب /وطني نيوز

كتب/محمد فتحي

ديفيد منيب .. مواليد ٢٠٠٠ المنيا.. طالب بكلية العلوم .. لقبني اكتر من حد بالشاعر الصغير الكبير .. وكنت سعيد جدا باللقب ده♥️ اول حاجة كتبتها كانت ف ٣ ابتدائي و كانت ترنيمة صغيرة ولحنتها كمان .. لكني مخدتش الموضوع ع محمل الجدية فا مكتبتش تاني .. رجعت للكتابة ف ٢ اعدادي لما حسيت ان عندي الموهبة و اقدر اكتب واعبر عن اللي جوايا و اول قصيدة ليا هي قصيدة دينية " لو لفيت " ومن بعدها ابتديت اقول شعر ف المدرسة و كان بيشجعني ع ده المدرسين و زمايلي .. ولكن كان البعض بيسخر مني .. بس الغريب أن السخرية زادت لما كبرت سنا و فنيا .. لقيت إهانات و شتايم و كم كلام سلبي محبط جدا .. قابلت ناس كتير شافوني عيل و مينفعش ابقي شاعر .. قابلت ناس كرهتلي الخير و بعدت عني .. ناس محبتش اسمي ولا موهبتي .. بس كفاية ان ربنا حاببها وبينميها له كل الحمد .. والإحباط ده دفعني اكتر موقفنيش .. ف الاغلب مقابلتش نقد بنّاء .. بس وجود النقد حتي لو هدام ف حد ذاته ده اكبر دفعة و تحدي و عزيمة ..
طبعا مثلي الاعلي ف الشعر الأستاذ العظيم الشاعر عبد الرحمن الأبنودي .. و طبعا المبدع المبهر الشاعر صلاح جاهين.. ف الجيل الحالي بميل لكتابة الشاعر عمرو حسن و إلقاء الشاعر مينا مجدي ..
كتبت قصايد كتير بس فيه نصوص معينة بعتز بيها جدا زي " مينا و محمد " و دي اول قصيدة تنزل في جريدة .. زي كمان " لحن بدون نوتة _ أهل التكرار _ خيبتا _من اعلي الجبل _ single مرتبط _ ف غيرة حبي طفل _ قلبي نبيتي _ سيبيني اخد بالي منك _ نُص كوميديان _ نهاية ارضنا "
اقول شِعر في مسارح اكتر و الرسالة توصل لناس تاني و تاني .. بشكر ربنا بفضله لحد الان قولت في مسارح كتير زي " مكتبة مصر العامة _ القوات المسلحة _ نادي الواي _ جرافيتي " و قريب بإذن الله هقول في " ساقية الصاوي " .. كمان مبسوط جدا اني قدرت بوقوف ربنا اوصل رسالة من خلال الشعر في كنايس كتير زي " كنيسة الرسولية الثالثة و الرابعة .. كنيسة الأخوة .. الكنيسة الخمسينية _ كنيسة الإنجيلية الاولي .. كاتدرائية يسوع الملك .. كنيسة الأنبا ارسانيوس .. كنيسة العذراء " وقولت كمان ف بعض الكنايس بالقري ..
كمان من اهدافي اني اكتب ترانيم و تتعمل كليب زي ترنيمة " حقك عليا " اتصورت من سنة و نزلت .. من تأليفي و الحاني و صوتي .. واستنوا خلال السنة دي الترنيمة المختلفة و الجريئة " اسم الدين "
طبعا بحلم اعمل ديوان ليا منفرد .. و رئيس الطائفة الرسولية شجعني جدا علي الكتابة و قالي باذن الله يتعمل ديوان باسمك .. فيه كتاب جماعي مشارك فيه بعنوان
" ورقة و قلم " من إنتاج دوار الفنون و منحة ابداعات ؛ الكتاب بيتباع ف الدوار حاليا و انتظروا المزيد من الكتب ..
بمناسبة المواقف الصعبة اللي اتعرضتلها .. من ٣ سنين جاتلي حالة احباط .. كنت مشترك مع مجموعة من الشباب ف ديوان شِعر .. حصلت مشكلة بخصوص عدد الورق راحوا طلعوني من الديوان خالص ، جيت اسأل الكاتب المسئول عن السبب قالي انت طفل و لسة علي قدك .. بالرغم أن مستواه ف الكتابة للأمانة كان عادي جدا .. طلعوني واتفاجئت ب ده بعدين و من غير اسف كمان ! كنت شايف منه كُره مع انه عمره ما شافني ولا اتعامل معايا .. المهم بعدها ب شهور عرفت بالصدفة ان الديوان اتلغي .. قولت اشكرك يارب اخدت حقي بطريقتك وواثق انك هتعوضني بغيره .. وفعلا ربنا عوضني وكرمني بكتاب جماعي "ورقة وقلم " من منحة ابداعات وإنتاج دوار الفنون "اكبر مركز ثقافي ف المنيا" .. اللي انت يارب بتلغيه بتبدأ بالأعظم منه .. شكرا ليك
حابب طبعا أشكر الناس اللي شجعتني اكمل كتابة .. القس " صفا وليم " دعمني كتير و بيعتز بموهبتي .. الاب " كيرلس مكسيموس " و كلماته المشجعة الجميلة .. بحب اشكر الشاعر الوطني " محمد فتحي " ساعدني كتير في نشر القصائد و انا بفتخر انه صديقي و اخويا .. حابب اشكر الشاعر المثقف " باهر زاهر " قالي " يا ديفيد انت شاعر جماهيري شاطر جدا و القاءك مميز و مؤثر " .. كمان مبسوط اوي بكلمة الملحن الموهوب الأستاذ حسن الدمشاوي " انت يا ديفيد هتعمل طفرة ف الشعر العامي " حابب اشكر الشاعر الكبير " مينا مجدي " قابلته و قالي " كمل انت موهوب و اسلوب كتابتك بالنسبة لسنك حلو جدا " .. و طبعا بحب اشكر أسرتي لان كان ليهم دور كبير ف اني اكمل كتابة و مستوايا يعلي اكتر ..
نزلتلي قصايد في جرايد و مواقع عالمية زي " الحق والضلال _ صوت المسيحي الحر _ الأهرام الكندي _ الجمهورية _ الوكالة المصرية _ فكرة_ العالم نيوز _ الراعي "
google-playkhamsatmostaqltradent
close