recent
أخبار ساخنة

نداء بالعاميه للازواج ... دكتوره فاطمه محمود / وطنى نيوز


 

 
دكتوره فاطمه محمود
كثير من القراء بيطلب انى اكتب عن العلاقات الزوجيه
《《وجعل بينكم مودة ورحمة》》
احنا مش في حرب ياجماعه
الطبطبة مش عيب.،
الكلمة الحلوة مش بتمرِع..
، الاهتمام مش محتاج مجهود و لا فلوس كتير ..
،بلاش نقف لبعض علي الواحدة وأحسنوا النوايا..
التفاصيل بتفرق و الاهتمام بيها بيصنع المعجزات..
بيموت أقوي حب بالاهمال وعدم الاحترام..
العشرة الطيبة ممكن تبقي أقوي في حبها من الرومانسية غير الناضجة.
الحب مش بالكلام و بس.. أكبر من كده بكتير..
،نجاح أي علاقة محتاج مجهود من الطرفين..
الشكوي من عيوب شريك حياتك الدايم هيزهقه حتي لو معاك الحق وبلاش مقارنات وبلاش دماغ ناشفة و إن شريك حياتك يزهق من النقاش معاك..
الست الذكية هي اللي عارفه ازاي تكسب جوزها..
والرجل الذكي هو اللي فاهم طبيعة الأنثي ..
الغلط بيجيب غلط أكبر منه.. الإحترام اهم حاجة..
وكبّروا دماغكوا..
وامدح في مراتك قدام الناس واللي مبيعجبوش العجب ده أكتر نوع مزعج في الجواز..
الرجل و الست بيكملوا دور بعض مفيش حد فيكم دوره مش مهم..
مراتك شايلة كتير أوي أوى.. ساعدها قد ما تقدر..
جوزك طالع عينه في الشغل.. قدّري تعبه..
النكد بيحول أي بيت لمكان يسد النفس.
كلمة تسلم إيدك مش صعبة وكلمة ربنا يخليك لينا مش صعبة..
الولاد مسئوليتكم سوا من الألف للياء..
اسمعها حتي لو كلامها تافه بالنسبه لك.. {هو مش تافه علي فكرة}..
اديله مساحته.. لما بتخنقي الراجل بيبقي قرفان أكتر و مش طايق عيشته.
خليكم شيك دايما فى اللبس وفى التعامل فى البيت.. هتفرق معاكم اوي..
احترموا بعض ، دلعوا بعض..مش عيب و لا حرام هزروا سوا ..بلاش غلاسة..
اللي زعلان ميشلش جواه.. الفضفضة بتجيب من الآخر..بلاش أنانية و إن في طرف مستني كل حاجة من التاني..
مفيش حد ملاك بس في ناس بتغلط و بتعتذر و بتحسن من نفسها..
بلاش دور الضحية.. ممل جدا..
التفاهم مهم أوي..اتكلموا كتير ..
متخليش شريك حياتك يقفل منك و يجيب آخره و أنت مصمم إنك تفضل زي ما أنت و خلاص عشان السكة دي اخرتها مش حلوة..
افتكروا لبعض الحلو بلاش سواد وبلاش ضربة البوز ..قولو اللي مزعلكو على طول..
متناموش متخانقين
فكتر الزعل بيعمل فجوة بين أي اتنين و بالوقت بيبقي ده العادي!
اتغيروا عشان بعض في اللي تقدروا عليه و تقبلوا الاختلافات اللي بينكم..
قدًمو السبت عشان تلاقو الحد و الاتنين و كل أيام الأسبوع ..
دكتورة فاطمه محمود
google-playkhamsatmostaqltradent
close