recent
أخبار ساخنة

رساله الى أولياء الامور .... دكتورة فاطمه محمود / وطنى نيوز


 

 
دكتورة فاطمه محمود
 
ابنك تعب طول السنة وقعد ١٢ شهر في ضغط عصبي ونفسى وذهني بالاضافة لضغط المادة العلمية اللي كان بيذاكرها .. ابنك اتعرض لمواقف كتير وحشة جدًا علي مدار السنة من مدرسين او مساعدين او مشاكل اثرت عليه جدًا وغيرت اجزاء كبيرة من شخصيته .. النتيجة هتطلع خلال ايام .. ايا كان درجة ابنك فحضرتك لازم تبقي متاكد ان ابن حضرنك عمل المطلوب منه وزيادة .. بلاش كلمة تطلع من حضرتك تأثر عليه وتضايقه .. ابن حضرتك هيبقي محتاج يشوف حضرتك راضي عنه وهو تعب طول السنة علشان يفرح حضرتك مش عشان له هدف او حلم عايز يوصل له هو حلمه الوحيد يشوفك مبسوط منه فحضرتك اقعد مع ابنك واثبت له ان بجد النتيجة دي عمرها ما هتفرق معاك طالما شوفت ابنك تعب واتبهدل طول السنة ..
اما بالنسبة لاخواتي الطلاب حبايب قلبي المرعوبين والمتوترين واللي بقالهم يومين عايشين في الحمام من الخوف فأحب اقولك انك أياً كان درجتك فكلنا فخورين بيك ومش هاممنا النتيجة احنا كفاية عندنا انك شخصية محترمة وجميلة واتعلمت تساعد غيرك وتأثر في المجتمع اللي حواليك .. ايا كانت درجتك فانت ناجح ومتفوق بالنسبة لنا .. الخير مش في كليات معينة وكليات تانية لا
الخير ربنا كاتبهولك من يوم ولادتك وربنا خلقنا سواسية ووزع علينا الارزاق بالتساوي جدا ورزقك هتاخده ٢٤ قيراط كاملين ساعات الرزق بيبقي مال او صحة او علم او راحة بال او رضا من ربنا او اهل كويسين فانت واخد رزقك كامل لو نقص شوية في العلم والكلية اللي انت عايزها فاكيد ربنا هيعوضك بالصحة والمال وراحة البال .. ماتبصش لرزق غيرك
ارضي بما قسمه الله لك هتعيش في بحر من النعم
مش عايز اشوفك حزين لو لقيت درجة مش عجباك عشان ده رزق بناخذه ونحمد ربنا عليه ماتقولش انا اتظلمت وغيري جاب اعلي مني ده وحرام انا عايز ادخل الكلية دي لان ممكن الخير ميكونش في الكلية دي .. سيب امورك علي الله وسيبها تمشي ببركة ربنا وتساهيله واي نتيجة هتجيبها فتاكد اننا بجد فخورين بيك وانا دايما واثق فيك انت هتبقي شخصية ناجحة
أتمني التوفيق للجميع وتكونوا مجبورين الخاطر
google-playkhamsatmostaqltradent
close