حوار / دكتور محمد مصدق
كابتن طيار ميار عزت تدرس الطيران في جنوب أفريقيا كان عندها حلم و بتحققه حاليا واحنا حبينا نشاركها لحظات نجاحها و تحقيقها لحلمها هنطير معاها من جنوب افريقيا لمصر علشان ننشر ليكم الحوار التالي مع اول كابتن طيار امرأة من إسكندرية
انا ميار عزت محمد عثمان احمد
19 سنه
من إسكندرية و اصولي من سوهاج
بدرس طيران مدني في جنوب افريقيا حالياً
* اختارتي ليه المجال دة :
كن مختلفاً,العالم ليس بحاجه للمزيد من النسخ ،كنت دايما بدور علي الاختلاف ازاي ابقا مش نسخه من حد و اعمل اللي مفيش بنات كتير بتعمله كنت بدور ازاي اكون مختلفه بأي طريقه واكون قدوة و رمز مشرف لاهلي وبلدي ونفسي ،كل الاطفال لما حد يسألهم عاوزين تبقوا ايه لما تكبروا كله يرد يقول دكتور ومهندس … الخ، كنت ببصلهم واقول جوايا انا لاء انا مش عاوزه اكون زيهم مش عاوزه اعمل حاجه كله بيعملها كان جوايا حلم مختلف كان جوايا هدف غير الكل كنت بقول لنفسي ليه مبقاش رائده فضاء مثلا لحد لما وصلت رابعه ابتدائي بدأ الحلم و الهدف انا عاوزة اكون كابتن طيار ادمنت المجال ده فجأة وكنت بقرأ عن الطيران يومياً واحلم بيه ليل و نهار واتخيل نفسي في العالم ده والحياه دي.
* ايه شعورك عند قبولك في اكاديمية الطيران :
كان شعور بالامتنان والحمدلله لكل حاجه وصلتني بعد ربنا لاول الطريق وكامل امتناني لابي وامي واخويا واختي وجدي ودعمهم ليا هو سبب وجودي فاللي انا فيه دلوقتي.
* كان من السهل انك تسيبي حياتك و تبدئي حياة جديدة مختلفة :
مكنتش متخيله انها بالصعوبه اللي انا عايشاها دلوقتي ولكن مادمت قررت ذلك …فكن قوياً
لم اخلق لأنتظر الفشل مقبلا علي كسر ظهري، حتي وإن كان الجحيم يقف ع اخر هذا الطريق لم اخلق لاستسلم، خُلقت لأقاوم مهما كانت الغربه صعبه والوحده اصعب سأصمد للنهايه، السفر مسئوليه انت مش بتشيل مسئوليه نفسك بس لاء! دا انت شايل دينك واعتقداتك ومبادئك وعاداتك وتقاليدك و تربيتك و مش سهل انك تعيش ف بلد اجنبيه وتختلط بأهلها وبثقافتهم وانت مسئول عن الصورة اللي هتوصل ليهم عن بلدك و دينك.
* احكي لينا عن اول مرة سوقتي فيها طيارة:
منذ ان عشقت هذا المجال كنت اردد لاكثر من ثلاث سنوات اغنيه
I believe I can fly
I believe I can touch the sky
I think about it every night and day
Spread my wings and fly away
شعرت في هذه اللحظه في اول مره ليا في الطيارة اني اخيراً وصلت للي بحلم بيه و شعوري اني فعلا لمست السماء واملكها بجد.
* ايه هو حلمك القادم :
اني اخلص الباقي من دراستي في اقصر وقت ممكن لبدايه حياتي العمليه في سن لا يتعدي العشرين عاما ويصبح انجازاً جديدا لي.
* مين قدوتك ومين شجعك علي الخطوة دي:
امي هي اكبر داعم ليا وسندي وقوتي هي اللي في ضهري من البدايه وحتي النهايه، امي كانت مؤمنه بيا وبحلمي واقسمت لي ان تساعدني في تحقيق حلمي، امي اعظم واقوي ام فالكون، امي اكتر انسان مضحي شوفته في حياتي من اجل إسعاد اولادها، سافعل كل شي لاجلها علشان تفضل فخوره بي دائماً.
* حابه تقولي ايه لاهلك اللي وقفوا معاكي علشان تحققي حلمك :
في ناس كتير خوفت اهلي من الخطوه دي ولكن امي و مي اختي كانوا واثقين فيا وفي حلمي وان ده فعلا المجال اللي شبهي وهقدر الاقي نفسي فيه احب اقولهم شكراً و شكراً علي كل حاجه وانكم اعظم واغلي رزق من ربنا ليا.
* تقولي ايه للاجيال الجايه بما انك قدوة حالياً لناس كتير وبالذات للبنات :
اجعلوا احلامكم كحمام الحرم مُحرم قتلها.
