recent
أخبار ساخنة

صاحب ابنك فهو الأولى بصداقتك بقلم.ناصر خليفة .. وطني نيوز

 بقلم.ناصر خليفة


((فضفضة بلدي )) 
● ازعل من ابنك زعل الصاحب من صاحبه،، وحبه حب الأب لابنه .! 
لما تزعل من ابنك "الشاب" متزعلش منه زعل الأب وعشمه في ابنه،، لا ! ازعل منه زي ما بتزعل من "صاحبك الأنتيم" ساعة لما بتحط حد للعشم الزايد وتلتمس لصاحبك الأعذار لان صاحبك له حياته الخاصة وأفكاره المختلفة وظروفه ودنيته ورؤيته للواقع المتغير في كل لحظة،، ابنك الشاب كمان له حياته الخاصة وأفكاره المختلفة وظروفه ودنيته ورؤيته للواقع .
ولو تعاملت مع ابنك في الإطار ده؛ هيدوب أي خلاف في وجهات النظر وأي زعل بينكم هيتبخر .
•• اما الحب فدا شيء غريزي ربنا خلقه جواك لأبنائك وبناتك، وابنك كمان بيحبك حب غريزي لكن مرهون بحجات كتير لأنه كان ممكن يربيه زوج أم ويحمل له نفس الحب اللي اتوجد بحسن المعاملة والتربية مش كده والا إيه !؟
•• لازم تعرف ان العلاقة العاطفية المتبادلة بينكم مش قاعدة أساسية لتصبح ملائكية ! بالطبع لا .. بل ربما يحدث العكس فالمبالغة في التركيز على علاقة الابوية والابنوية -إن صح التعبير - قد تقلب الأمور وتؤدي بها إلى تنافر وعراك وصدام وخصام وربما طفشان وربما انتحار كما فعل هذا الشاب الذي انتحر بسبب مشاكل مع والده !.
•• مطلوب تحب ابنك وتراعيه وتقرب منه وتشور عليه وتنصحه وتوجهه لكن قبل كل ده لازم تحترمه وترفع من قدره وتعلي من شأنه وكيانه وتحُسن الظن في افكاره، ورأيه ووجهة نظره، يعني تقدر شخصيته بشكل عام ..
•• لو معملتش كده وعشت في دور الأب السلطان الآمر الناهي ! متطلبش منه أي بر ولا أدنى طاعة .!
•• ومتفكرش انك عشان كنت بار بوالديك (دا إذا كنت فعلا كده) فإجباري ابنك هيعمل زيك ! لا طبعا مش شرط ! لان مفترض إنك كنت بارا بوالديك علشان دا امر ربنا، وربنا انعم عليك بطاعته في بر الوالدين والإحسان إليهما، يعني برك لك وعلشان نفسك انت.. اصل البر بالوالدين مش قرشين عُمي سلفتهم لحد بطلوع روح و بنية انه يرجعهملك ! 
وإلا يبقى عملك ذهب هباءا ! بر ابنك بيك دا عمله هو ربنا هيجازيه بعد كده وعملك لك ربنا هيجازيك على قدر نيتك ومش شرط يكون الجزاء من جنس العمل دايما ممكن في أشياء تانيه ربنا أعلم بها .. وكل إنسان ألزمناه طائره في عنقه .
حافظوا على صداقة ابنائكم وبناتكم خاصة في سن الشباب .
دمتم سالمين
google-playkhamsatmostaqltradent
close