recent
أخبار ساخنة

اذكروا محاسن سنواتكم..بقلم : ناصر خليفة .. وطني نيوز

بقلم : ناصر خليفة  

هو احنا ليه دايما كده وليه كده دايما ،، ليه في نهاية كل سنة وفي الأيام  الأخيرة من شهرها الأخير وهي على آخر درجات سلم الرحيل؛  نستلمها باللوم والعتاب  ونطَّلع فيها القط الفطيس !! فيها وفي أحداثها وبلاوي أيامها ! عمرنا مفتكرنا لسنة فاتت حاجة حلوة ابدا ابدا.. فالحين بس نقلبها مندبة ونلطم حظنا في كل ساعتها وأيامها  وشهورها ! وكأننا نبكي حالنا للسنة الجديدة  ! نستعطفها، ونقولها وحياة أبوكي يا شيخة وحياة ولادك شهورك وأيامك ؛ تخليكي حنينة علينا وكفاية اللي عملته اختك السابقة فينا ! ونبكيلها ونقولها : ياختي دا اللي جرالنا معاها  ما يرضي عدو ولا حبيب ! طيب مش هي برضو (٢٢) اللي كنا مستقبلينها زي الأيام دي وكنا رافعينها فوق شواشي النخل و فوق راسنا وبنبارك لبعضنا لما هلت بسلامتها علينا  وبنقول دي ارقام زوجية ،،وهتكون سنة سعيدة وبالسكر متحلية ،،!؟ وفي نفس ذات  الوقت نازلين طحن في (٢١) الغلبانة  وبنقول دي كانت فردية وغبية !!
•• كده حرام  وحرام كده !
حرام عليكو تبهدلوا في سنين ربنا وأيامه لأنها ملهاش علاقة لا بنصيبنا ولا حظنا ..هي فقط أيام ربنا يداولها بين خلق ربنا .. كفاية ندالة مع السنين كفاية عبط ودموع الفاشلين كفاية أماني الخيبانين  ودموع الحيرانين !  كفاية غلط في حق الأيام والسنين ..  وافتكروا دايما كل لحظة حلوة مرت علينا ومرينا فيها وكانت نعمة من ربنا الرحمن الرحيم.. احمدوا ربنا دايما على كل لحظة مرت علينا واحنا مستورين وكل كارثة مرت وكنا بفضل ربنا ورحمته  ناجين سالمين  .. لازم تعرفوا إن كل شيء بإرادة ربنا وقضائه وقدره
وان كل حاجة بتحصل هي من عند ربنا اختبار وامتحان لعباده .
(إِن يَمْسَسْكُمْ قَرْحٌ فَقَدْ مَسَّ الْقَوْمَ قَرْحٌ مِّثْلُهُ ۚ وَتِلْكَ الْأَيَّامُ نُدَاوِلُهَا بَيْنَ النَّاسِ وَلِيَعْلَمَ اللَّهُ الَّذِينَ آمَنُوا وَيَتَّخِذَ مِنكُمْ شُهَدَاءَ ۗ وَاللَّهُ لَا يُحِبُّ الظَّالِمِينَ } 
(آل عمران 140) ..
•• افتكروا دايما اننا داخلين على عيد ميلاد السيد المسيح عيسى الرسول الطيب الرحوم الرؤوم ابن مريم العذراء البتول .. مريم الطاهرة التي كانت - (قبل أن تلد عيسى الحبيب) كلما دخل عليها  زكريا المحراب وهي تتعبد لله ووجد عندها رزقا -طعام وشراب- استعجب وسألها من أين لكِ هذا يا مريم؟! ترد وتقول هو من عند الله . سبحان الله وبحمده سبحان الله العظيم .
google-playkhamsatmostaqltradent
close